1Cor 1 | NdeIBE | STEP | UPhawuli, obizelwe ukuba ngumphostoli kaKhristu uJesu ngentando kaNkulunkulu, kanye lomzalwane wethu uSosithene.

1 Corinthians 1

1 UPhawuli, obizelwe ukuba ngumphostoli kaKhristu uJesu ngentando kaNkulunkulu, kanye lomzalwane wethu uSosithene.

2 Ebandleni likaNkulunkulu eKhorinte, kulabo abangcweliswe kuKhristu uJesu babizelwa ukuba ngcwele, kanye labo bonke abasezindaweni zonke abakhuleka ebizweni leNkosi yethu uJesu Khristu – iNkosi yabo leyethu.

3 Umusa lokuthula okuvela kuNkulunkulu uBaba leNkosini uJesu Khristu kakube kini.

Ukubonga

4 Ngiyalibingelela kuNkulunkulu njalonjalo ngenxa yomusa wakhe eliwuphiweyo kuKhristu uJesu. 5 Ngoba kuye linothiswe ngezindlela zonke – ekukhulumeni kwenu konke lasekwazini konke – 6 ngoba ubufakazi bethu ngoKhristu baqiniswa kini. 7 Ngakho kalisileli lakusiphi isipho somoya lapho lilindele ngokutshiseka ukuba iNkosi yethu uJesu Khristu ibonakaliswe.

8 Izaligcina liqinile kuze kube sekupheleni, ukuze lingabi lacala ngosuku lweNkosi yethu uJesu Khristu.

9 UNkulunkulu, olibizele ekuhlanganyeleni leNdodana yakhe uJesu Khristu iNkosi yethu, uthembekile.

Ukudabukana Ebandleni

10 Ngiyalincenga, bazalwane, ngebizo leNkosi yethu uJesu Khristu, ukuba lonke livumelane ukuze kungabi lokudabukana phakathi kwenu kanye lokuthi libe ngabamanyeneyo engqondweni lasemcabangweni.

11 Bazalwane bami, abanye abendlu yakoKlowe bangitshele ukuthi kulezingxabano phakathi kwenu.

12 Engikutshoyo yilokhu: Omunye wenu uthi, “Mina ngilandela uPhawuli,” omunye uthi, “Mina ngilandela u-Apholo;” omunye uthi, “Mina ngilandela uKhefasi;” omunye laye uthi, “Mina ngilandela uKhristu.”

13 Konje uKhristu wahlukanisiwe na? UPhawuli wake wabethelwa ngenxa yenu na? Konje labhaphathizwa ngebizo likaPhawuli na?

14 Ngiyabonga ukuthi kangibhaphathizanga lamunye wenu ngaphandle kukaKhrisiphusi loGayiyu,

15 ngakho kakho ongathi labhaphathizwa ngebizo lami. 16 (Yebo ngabhaphathiza abendlu kaStefana, ngaphandle kwalokho angikhumbuli ngibhaphathiza omunye.) 17 Ngoba uKhristu kangithumanga ukuba ngibhaphathize, kodwa ukuba ngitshumayele ivangeli – hatshi ngamazwi enhlakanipho yabantu, hlezi isiphambano silahlekelwe ngamandla aso.

UKhristu UyiNhlakanipho LaMandla KaNkulunkulu

18 Ngoba ilizwi lesiphambano liyibuthutha kulabo ababhubhayo, kodwa kithi abasindisiweyo lingamandla kaNkulunkulu.

19 Ngoba kulotshiwe ukuthi: “Ngizachitha ukuhlakanipha kwabahlakaniphileyo; ukwazi kwabakhaliphileyo ngizakunqunda.”

20 Ungaphi umuntu ohlakaniphileyo na? Singaphi isifundiswa na? Singaphi isazi sakulezinsuku na? UNkulunkulu kenzanga ukuhlakanipha kwasemhlabeni kwaba yibuthutha na? 21 Ngoba njengoba ngokuhlakanipha kukaNkulunkulu umhlaba ngokuhlakanipha kwawo kawumazanga, uNkulunkulu wathokoza ngobuthutha balokho okwatshunyayelwayo ukuze kusindise abakholwayo. 22 AmaJuda afuna izibonakaliso zezimangaliso lamaGiriki adinga ukuhlakanipha, 23 kodwa thina sitshumayela uKhristu owabethelwayo: isikhubekiso kumaJuda lobuthutha kwabezizwe, 24 kodwa kulabo ababizwe nguNkulunkulu, amaJuda lamaGiriki, uKhristu ongamandla kaNkulunkulu lokuhlakanipha kukaNkulunkulu.

25 Ngoba ubuthutha bukaNkulunkulu buhlakaniphile kulokuhlakanipha komuntu, lobuthakathaka bukaNkulunkulu bulamandla kulamandla omuntu.

26 Bazalwane, khumbulani ngalokho elaliyikho ekubizweni kwenu. Kababanengi phakathi kwenu ababehlakaniphile ngesilinganiso sabantu; kababanengi ababelamandla; kababanengi ababezalwa yizikhulu.

27 Kodwa uNkulunkulu wakhetha izinto zasemhlabeni eziyizithutha ukuba ayangise abahlakaniphileyo; uNkulunkulu wakhetha izinto zasemhlabeni ezibuthakathaka ukuba ayangise abalamandla. 28 Wakhetha izinto zalo umhlaba eziphansi lezinto ezeyisekayo kanye lezinto ezingekho – ukuba achithe okukhona,

29 ukuze kungabi lamuntu ozazincoma phambi kwakhe. 30 Ngenxa yakhe lina likuKhristu uJesu, yena osebe yikuhlakanipha okuvela kuNkulunkulu esenzela thina – okuyikuthi ukulunga kwethu, ubungcwele lokusindiswa.

31 Ngakho-ke kunjengoba kulotshiwe ukuthi: “Lowo ozincomayo kazincome eNkosini.”